casa Porta Pfister

En ina pintga part dil vitg dalla vischnaunca da Trin Mulin, ella vischinonza dalla Ruinaulta, ei cun la casa da pliras famiglias Porta Pfister, naschiu in baghetg niev che s’integrescha sapientivamein ella cuntrada bostgusa e greppusa. Il patrun da baghegiar ha giavischau ina construcziun da habitar cumpacta, che respecta d’ina vart il caracter dalla cuntrada tipica pil liug e che muossa da l’autra vart in clar lungatg architectonic contemporan.

Il tgierp da construcziun realisescha quei sur sia cubatura e materialisaziun: Ina fatschada ventilada ord lenn larisch resistent all’aura, sesa sin in sochel massiv da betun e franchescha la casa opticamein en siu contuorn greppus. Paucs materials – eligi cun quitau, sco era finas, el medem mument marcantas finiastras dattan agl edifeci in’expressiun reducida, nunagitada che suonda il ductus dalla capientscha architectonica moderna, senza sedistaccar dalla structura dil vitg.

In element special ei la surfatscha dil tetg: Il tetg d’irom vegn perfuraus d’ina lucarna da betun natural, che dat al plaun sut il tetg in agen balcun e cheutras in marcant augment da confort da habitar. En tut ein treis unitads da habitar naschidas, ch’ein colligiadas via scala communabla, directamein culs quater parcadis el plaun sutterran.

La cumparsa exteriura reducida cuntinuescha consequentamein egl intern: Ina cozza dira da betun natural frunta sin in plantschiu da lenn lom e prezius, ferton che surfatschas da preits ligiadas giu en alv, intermedieschan denter omisdus munds da material. Grondas finiastras da panorama laian cular la cuntrada dallas alps grischunas, tochen profund ellas stanzas da habitar e fan aschia ord la survesta il punct central da mintga habitaziun.