mastergnanza
Alla Poststrasse 22 a Cuera ei l’entira quarta alzada dalla sedia principala dalla RRT AG Treuhand & Revision, vegnida baghegiada entuorn ad in ambient da lavur modern per tochen 15 collaboraturs. La nova structura da spazi s’integrescha sco secapescha el plaun sut il tetg existent, senza midar la cumparsa exteriura dil baghetg.
La nova partiziun structurada dallas localitads cumpeglia ina stanza da seduta, quater stanzas da biro da differenta grondezia, ina recepziun, in local da cuminonza cun cuschina, ina stanza da copiar, ina gardaroba sco era indrezs sanitars. Viadis cuorts ed in’organisaziun clara, creeschan spazis da lavur funcziunals ed emperneivels.
In plantschiu su frestgentont e caliront – ord cartun da gep perfurau dat tempra allas stanzas ton climaticamein sco era acusticamein. Ella procura la stad per refrestgament, sustegn igl unviern il scaldament e meglierescha il medem mument l’acustica dalla stanza.
Las isolaziuns ellas pendenzas dil tetg e denter ils plantschius ein vegnidas renovadas cumpleinamein ed il mir da grunda ei vegnius isolaus supplementarmein endadens. Cun remplazzar pliras preits purtontas cun ina nova construcziun da sustegn e da plantschiu sura, han ins saviu crear spazis utilisabels pli aviarts e flexibels. Tuttas finiastras ein vegnidas remplazzadas ed adattadas, risguardond las pretensiuns dat oz pertuccont l’isolaziun termica e l’efficienza energetica.
L’entira lavur da scrinari sco escha e scaffas da preit ei vegnida exequida en “ruver natura”. In parchet a restas da pèschs tschentaus trasatras, colligia ils singuls secturs ad in entir e dat als locals ina radiaziun caulda d’aulta qualitad. Era ils locals sanitars ein vegni concepi cumpletamein da niev ed vegni integrai cun novas surfatschas, apparats sanitars e cuvridas da plattas, el concept surordinau da material e formaziun.
In’attenziun speciala ha plinavon il mobiliament ed igl equipament dallas novas stanzas da lavur giu. Ils local da sesida e da cuminonza ein vegni endrizzai cun mobilias d’aulta qualitad, conform al temps, che s’integreschan cun materialitad, fuorma e coluraziun a moda reservada ell’architectura. Las localitads da biro han survegniu meisas da lavur modernas, sco era in’illuminaziun accordada als plazs da lavur. Aschia contribueschan era las mobiglias essenzialmein ad in’atmosfera da lavur funcziunala ed el medem mument emperneivla.
La tecnica digl edifeci ei vegnida sanada cumplessivamein. Installaziuns existentas ein ton sco pusseivel vegnidas duvradas vinavon, cumpletadas ed adattadas allas pretensiuns dad oz. Ils indrezs tecnics ein vegni reorganisai ed el decuors dallas lavurs ei era la cabina digl ascensur vegnida remplazzada.
Aschia ei naschiu ord dus secturs utilisai differentamein, in plaun da biro coherent, cun clara structura e tecnicamein conform al temps, nua che architectura, materialisaziun e mobiliar s’uneschan ad in maletg cumplessiv harmonic.
