Stenna Loft, Flem

El cor da Flem, gest sur il center da cumpra e divertiment Stenna, ei naschiu denter 2021 e 2023 l’engrondaziun dall’emprema alzada sura als «Stenna Lofts» – 26 appartaments moderns da self-check-in cun vesta sil vitg e sil Crap da Flem marcants. Il patrun da baghegiar ha encuretg in concept da pernottaziun conform al temps, che cumbinescha la vischinonza directa dalla staziun a val e dil center da cumpra, cun in agen sentiment da habitar d’aulta qualitad.

Il retscheviment succeda consequentamein a moda digitala: In grond monitur surpren il self-check-in, la clav dalla combra vegn dada ora en fuorma d’ina carta da credit ed era il check-out selai far cumadeivlamein via smartphone. Quella guida da hosps cuntinuadamein automatisada, possibilitescha ina dimora nuncumplicada e flexibla – adattada alla situaziun amiez il center fatschentau, senza ch’ins sesenti leu era aschia

Materialisai ein ils lofts en lenn clar ed ina optica da crappa artificiala, cumpletada el spazi d’avertura cun in teppi encunter la canera cun musters da glina. Semplas construcziuns da lenn paran d’esser ensemen cun canapé, cruna, letg e baun da seser ord in concept da mobigliar sco ord ina cula. Eschs da stuschar aults sco las stanzas, lubeschan da separar las zonas da durmir cun lur letgs generus, tenor basegns dil spazi da habitar aviert, ferton ch’ina cuschina endrizzada praticamein cun maschina da caffè e maschina da lavar giu accentuescha l’independenza dils appartaments.

Purschiu vegnan treis categorias: lofts cumpacts «2er» per pèrs sco era «4er-lofts» e «4er-lofts plus» per famiglias ni gruppas d’amitgs. La generusa survesta sin Flem ed il Crap da Flem, sco era il cumadeivel interiur laian leutier spert emblidar ch’il suttetg sesanfla atgnamein sur in center da cumpra – ina circumstanzia che daventa la sera tras ils cuorts viadis tier stizuns ed ustrias el Stenna Center il ver avantatg. Ils lofts ein vegni aviarts il december 2023.