casa jettli

El quartier da Flem Dadens steva dapi il 17avel tschentaner ina casa da habitar cun barcuns verds caracteristics, rodund tschien onns en possess dalla medema famiglia. Suenter la mort dalla davosa cussadenta igl onn 2016 ei la nova famiglia possessura stada avon la damonda, co ir entuorn cun la construcziun da caltschiel buca sutterrada ed il clavau cunfinont. Enstagl d’ina spazzada cun baghegiar niev – la pli sempla, denton per la famiglia negina opziun – ein ins sedecidi per ina midada precauta, che mantegn il maletg dil quartier e che creescha el medem mument niev spazi da habitar pagabel per indigens.

Il concept sparta duas parts da baghetg: il coc historic ei vegnius scalpraus cumpleinamein e reorganisaus egl intern, per dar suttetg a duas habitaziuns da proprietad conform al temps – ina habitaziun da 4½ stanzas el plaunterren, sco era ina habitaziun generusa da 5½ stanzas sur il plaun sura e sut il tetg, cun l’opziun sin ina varianta da 7½ stanzas. Enstagl digl anteriur clavau dalla vart dil sid, ei naschiu in niev baghetg cun treis habitaziuns per affittar per famiglias indigenas, cumpletaus cun ina garascha sutterrana, alla quala igl access ei vegnius sligiaus aschia, che la via da quartier vegn schanegiada dil traffic supplementar.

Constructivamein vegn la construcziun existenta da caltschiel da lenn cun siu fundament da crappa criua mantenida e vegn surtratga internamein cun ina construcziun da tschabergals da lenn, cun isolaziun termica da cellulosa. Tetg e il sistem da lingias ein vegni renovai cumpletamein, la cuvrida succeda en irom, las finiastras en larisch engarschau cun treidubla vetrificaziun; ils barcuns historics ein vegni sanai e colurai da niev el verd original. Scaldau vegn CO₂-neutral sur la colligiaziun alla reit da calira a distanza, cun scaldament da plantschiu a temperatura bassa. Sin in scaldament d’ieli ei vegniu desistiu sapientivamein.

Special ei il temps da baghegiar accurat da varga dus onns ed il agir cun la historia dil liug: La casa ha suenter rodund 400 onns survegniu l’emprema gada in agen num, «Jettli», tenor sia davosa habitonta da biars onns. «Nus essan perschuadi che quella moda da finanziar il manteniment dat immobilias veglias ei preziusa, per in saun svilup dils quartiers, dalla vischnaunca e dil turissem», aschia Werner Rüegg, possessur da Rüegg Architects. Il project muossa co la vendita da singulas habitaziuns da proprietad, sa possibilitar la finanziaziun da spazi d’habitar a tscheins favoreivel per la populaziun indigena.