Sentupada Nova

El center vegl dil vitg da Laax, en vischinonza directa da baselgia, santeri e casa pervenda, ei naschiu el rom d’ina incarica da studi il project per la nova Sentupada – in niev center da sentupada che duei remplazzar la Sentupada existenta, ch’ei vegnida els onns. Denominaziun per la proposta da project ei il num romontsch «Stivada» che designescha ina stiva plein glieud: Il baghetg niev duei vegnir percepius sco liug da cuminonza el vitg, cun in ensemble da plazs e locals per sentupadas multifaras.

Urbanisticamein siara il baghetg niev giu il cantun sidvest digl areal dalla baselgia. Il mir da sustegn dil santeri prolunghius e la distanza sapientivamein eligida enviers la casa pervenda, creeschan in spazi generus egl ost, sco era in pign parc per liung dalla via da santeri el nord. Il volumen resta sapientivamein decents e sin in plaun, s’orientescha aschia vid la structura dil vitg existent e respecta il horizont da vesta sin l’entrada principala dalla baselgia. In tetg cun quater alas extendius intermediescha denter ils differents aspects visuals e creescha el medem mument in spazi exteriur envidont, schurmegiaus dall’aura.

La repartiziun d’utilisaziun suonda la topografia: Sin plaun dil vitg sesanfla la sala principala sco liug central d’occurrenzas, suten dispona il baghetg d’in ulteriur foyer cun duas salas cumbinablas, entochen tier in local da giuventetgna independent cun access separau ed atrium schurmegiau. Ina structura primara rastrada procura per flexibilitad d’utilisaziun a liunga vesta.

Architectonicamein caracterisescha il tetg cun slondas da fotovoltaica en fuorma da romboid la cumparsa, sut la quala il plaunterren sesarva sin l’altezia dil vitg cun ina vetrificaziun aulta enviers il spazi public. Il sochel el plaun sutterran consista da crap natural local e meina vinavon il mir santeri, ferton ch’il purtader ei concepius sco cumbinaziun hibrida da lenn massiv e betun reciclau.

Persistenza ei stada naven dall’entschatta in criteri central: ina separaziun consequenta da structura primara, secundara e terziara levgiescha ina demontascha futura. La surfatscha dil tetg da rodund 330 m² savess cuvierer cun ina prestaziun da PV da circa 50 kWp igl agen basegns dalla Sentupada e casa pervenda e la construcziun leva reducescha la bilanza da CO₂ enviers ina construcziun massiva per rodund 20 entochen 25 pertschien.