casa Baumann Spycher

Integrada ella construcziun carschida dil coc historic da Flem Vitg, ei naschida ina casa da pliras famiglias cun treis habitaziuns generusas da 4½ stanzas. Il patrun da baghegiar ha encuretg per la parcella levamein ascendenta, che dispona d’in access sco era d’in ruasseivel plaz da seser communabel per ils habitonts:as dallas alzadas sura, ina sligiaziun adequata al temps, denton considerablamein reservada el senn dalla vischnaunca da Flem, che dat sco liug da habitar, luvrar e vacanzas peisa ad in’aulta qualitad da viver ed ad ina cuntrada intacta.

Il tgierp da baghegiar ei construius sur treis alzadas: el plaunterren sesanfla ina habitaziun cun access direct al curtgin ed atgna entrada laterala, ferton ch’il plaun sura ed il plaun sut il tetg cun mintgamai atgnas parts da habitar, da magliar e da seretrer – lundergiu ina stanza separada per televisiun e lectura – s’extendan sur l’entira profunditad dil baghetg. Tuttas treis unitads disponan da balcuns generus da 42 m², sco era d’in spazi exteriur da veider schurmegiaus dil vent. L’entrada succeda sur ina scala centrala cun ascensur, el plaun sutterran ein tschalers, ina cuschina da lavar, ina pintga stanza da fitness sco era la garascha cun spazi per velos.

Constructiv metta il baghetg sin ina moda da baghegiar classica massiva: miraglia da quadrels purtonta cun in’isolaziun termica externa da rodund 20 cm, plantschius sura en betun d’itschal ed in tetg cun ina pendenza da 17 grads, cuvretgs en stuors d’Uginox. Las finiastras ein fatgas en larisch natiral cun veider da schurmetg termic, treidubel isolau. Scaldada vegn la casa sur ina pumpa da calira cun sonda sutterrana, cun scaldament da plantschiu a temperatura bassa, ina metoda energeticamein persistenta, che desista da sistems da scaldar fossils.