Casa Val Cotschna

Sur Flem, egl uclaun da Fidaz, ei 2011 naschida la casa da pliras famiglias “Val Cotschna”. Cun sis habitaziuns sin ina parcella spundiva, per liung d’in pign ual, duess in grond volumen da baghegiar vegnir adattaus ella topografia movibla.

Seformau ei ina fuorma da baghetg dublamein inclinada, che suonda il decuors natural dalla spunda e dividescha il volumen en plirs segments. Viers sid sesarva la casa cun finiastras generusas, che creeschan stanzas inundadas da glisch e che dattan liber la vesta silla cadeina da muntognas Signina. Viers nord, viers la via e la spunda, cumpara il baghetg pli serraus: ina fatschada massiva cun surfatscha criua da crappa naturala surpren cheu ina funcziun da schurmetg enviers aura e traffic.

Materialisaus ei quei cuntrast consequentamein era el detagl: Il crap natural dir alpin dalla fatschada nord, stat en in giug alternont cun finiastras da lenn natural, che procuran egl intern per in’atmosfera habitabla e caulda. Quella confruntaziun da schurmetg ed avertura e da material dir a cauld, dat la tempra all’expressiun architectonica dalla casa. Tier la habitaziun el plaun sut il tetg, s’audan in spa sco era ina stanza da fitness, che cumpleteschan il habitar sur la singula habitaziun ora.

Cun il stretg entretschament da fuorma da baghetg e topografia, sco era la clara differenziaziun denter la vart nord exponida all’aura e la vart sid envidonta, muossa la casa da pliras famiglias a Fidaz, sco il habitar alpin densificau selai realisar sin in terren da spunda pretensius, senza sminuir la preschientscha dalla cuntrada.